Jarðfræðiferð HÍN og Útivistar

Farin verður jarðfræðiferð þann 12 apríl og mun Ólafur Ingólfsson Prófessor Emerítus við jarðvísindadeild HÍ leiða ferðina. Gengið verður um Búrfellsgjá. Gangan er auðveld og hentar vel fyrir fjölskylduna. Frítt er fyrir 17 ára og yngri.

Skráning fer fram hér

Ferðalýsing:
Farið er á eigin bílum og hist á bílastæði við Hjallaenda á Heiðmerkurvegi, um 2 km austan Garðabæjar.

Gengið til austurs að Hjallamisgenginu, og þar verður rætt um eldvirkni í Búrfelli og brotahreyfingar sem ullu myndun misgengja og sprungna á svæðinu. Sprungusveimur Krýsuvíkureldstöðvarinnar, kvikuhlaup og eldgos í Búrfelli – allt á þetta samsvörun í því sem nú er að gerast á Reykjanesi. Við ræðum hvaða ógn Höfuðborgarsvæðinu getur stafað af eldsumbrotum í Krísuvíkurkerfinu.

Stoppað við Vatnsgjá og Gjárétt. Saga mannvirkja þar rædd, og skimað til grunnvatns.
Haldið áfram upp Búrfellsgjá, en hún er um 3,5 km löng hrauntröð sem þrengist smám saman er nær dregur Búrfelli. Ummerki um hrauná sem runnið hefur niður gjána eru skoðuð.

Gengið upp á suðurjaðar gígsins í toppi fjallsins. Búrfell myndaðist í einu eldgosi fyrir um 8000 árum. Gígurinn er um 180 m hár, og um 140 m í þvermál. Gígurinn sjálfur er gjall og klepragígur, hlaðin upp við kvikustrókavirkni úr hrauntjörn í gígnum. Frá eldstöðinni hefur runnið mikið hraun, sem hefur nýrunnið þakið um 25 ferkílómetra, og myndar stóra hluti þess lands sem Hafnarfjarðarbær og Garðabær standa á. Lengst náði hraunið til Álftaness. Hraunið hefur ýmist ásýnd helluhrauns eða apalhrauns, og er um eða yfir 20 m þykkt að jafnaði. Heildarrúmmál hraunsins er um 0,5 rúmkílómetrar. Í hrauninu er fjöldi hella. Eftir stutta dvöl á toppi Búrfells verður gengið til baka sömu leið – og málin rædd á leiðinni.

Gangan er um 5 km löng, fylgir göngustíg, en dálítil lausamöl síðasta spottann upp á Búrfell. Þetta er auðveld/létt ganga, að mestu nánast á jafnsléttu. Léttir gönguskór með þokkalegu gripi eru æskilegir, og göngustafir geta létt gönguna upp á gígbarminn. Gangan tekur um 4 klst, með góðu tómi til að svipast um og ræða málin.

Meira um ferðina á þessum viðburði