Greinasafn fyrir merki: Náttúrufræðingurinn

Nýr vefur Náttúrufræðingsins

Nú á dögunum fór í loftið nýr vefur Náttúrufræðingsins, natturufraedingurinn.is. Á vefnum má nálgast ný tölublöð tímaritsins ásamt öllum helstu upplýsingum um tímaritið þ.á.m. leiðbeiningar til höfunda. Það er von þeirra sem að vefnum standa að hann muni vaxa og dafna þegar fram líða stundir.

Útgáfa Náttúrufræðingsins hófst árið 1931 og hefur verið samfelld í átta áratugi. Það er því um stórt skref í útgáfu tímaritsins að ræða sem verður þó líkt og áður gefið út á prenti.

Útgáfa tímaritsins er kostuð af Hinu íslenska náttúrufræðifélagi og Náttúruminjasafni Íslands. Tímaritinu hefur frá upphafi verið ætlað að vera alþýðlegt fræðslurit þar sem birtar eru greinar um náttúrufræði. Í því birtast jafnt fræðilegar greinar í bland við almennan fróðleik. Allir félagar Hins íslenska náttúrufræðifélags eru áskrifendur Náttúrufræðingsins.

Nýtt hefti Náttúrufræðingsins

Út er komið 3.–4. hefti Náttúrufræðingsins, 91. árgangs. Í heftinu er m.a. sagt frá brislingi sem er nýfundinn nytjafiskur við Ísland, mítlum sem húkka sér far með drottningarhumlum og sauðfé sem étur kríuegg og -unga. Forsíðuna prýðir hvít tófa í fjöru en í heftinu er fyrsta grein af þremur um íslenska melrakkann og fjallar um stofnbreytingar, veiðar og verndun refastofnsins. Loks er gerð grein fyrir lifnaðarháttum og útbreiðslu skötuorms á Íslandi, stærsta íslenska hryggleysingjans sem þrífst í vötnum á hálendinu. Heftið er 84 bls.

Útgefendur eru Hið íslenska náttúrufræðifélag og Náttúruminjasafn Íslands. Ritstjóri er Álfheiður Ingadóttir, líffræðingur og er þetta sextánda heftið sem hún ritstýrir frá árinu 2014.

Nýr ritstjóri Náttúrufræðingsins

Gengið hefur verið frá ráðningu í starf ritstjóra Náttúrufræðingsins sem Hið íslenska náttúrufræðifélag og Náttúruminjasafn Íslands auglýstu laust til umsóknar 22. nóvember s.l. en umsóknarfrestur rann út þann 15. desember. Alls bárust sex umsóknir um starfið og var samhljóða niðurstaða beggja aðila að ráða Margréti Rósu Jochumsdóttur sem nýjan ritstjóra Náttúrufræðingsins.

Margrét hefur meistaragráðu í hagnýtri ritstjórn og útgáfu og hefur víðtæka reynslu í útgáfu og vefumsjón auk þess sem hún stundar nú nám í umhverfis- og auðlindafræði. Mun Margrét sjá um hefðbundna útgáfu blaðsins auk þess að hafa umsjón með nýrri vefútgáfu tímaritsins. Margrét hefur störf í byrjun febrúar 2022 og áætlað er að vefur tímaritsins verði opnaður á aðalfundi félagsins í lok febrúar, ef allt gengur eftir. Við bjóðum Margréti velkomna til starfa og hlökkum til samstarfsins. Álfheiði Ingadóttur, fráfarandi ritstjóra, þökkum við kærlega fyrir áratugastarf við útgáfu blaðsins en hún mun starfa áfram við ýmis störf fyrir Náttúruminjasafnið.

Ritstjórnarstefna Náttúrufræðingsins

Á árinu lauk stjórn við að endurskoða ritstjórnarstefnu Náttúrufræðingsins og er hún nú aðgengileg hér á heimasíðunni undir flipanum Náttúrufræðingurinn. Endurskoðuð stefnan var samþykkt af stjórn félagsins og í sumar send bæði ritstjórn Náttúrufræðingsins og forstöðumanni Náttúruminjasafns Íslands til umsagnar en NMSÍ styrkir útgáfu ritsins til helminga á móti félaginu.