Greinasafn eftir: Hið íslenska náttúrufræðifélag

Aðalfundi lokið og ný stjórn tekin við

Aðalfundur félagsins var haldinn í gær, 28. febrúar í Krummasölum Náttúrufræðistofnunar, auk þess að vera streymt. Aðalfundargerð má nálgast hér á heimasíðunni.

Á fundinum voru kosnir þrír nýjir stjórnarliðar sem við bjóðum hjartanlega velkomna og í kvöld fundaði nýja stjórnin auk fráfarandi ritara, Gróu Valgerði Ingimundardóttur. Það er ekki laust við að það hafi verið sérstaklega ánægjulegt að sjá stjórnina fullskipaða en hún hefur verið fámenn nú um nokkurt skeið. Stjórnin skipti með sér verkum í kvöld og varð verkaskiptingin eftirfarandi:

Ester Rut Unnsteinsdóttir, formaður, endurkjörin til tveggja ára 2022
Hrefna Sigurjónsdóttir, varaformaður, endurkjörin til tveggja ára 2021
Bryndís Guðrún Róbertsdóttir, gjaldkeri, kosin til tveggja ára 2022
Hrefna Berglind Ingólfsdóttir, ritari, kosin til eins árs 2022
Anna Heiða Ólafsdóttir, félagsvörður, endurkjörin til tveggja ára 2022
Helena W. Óladóttir, fræðslustjóri, endurkjörin til tveggja ára 2022
Hlín Halldórsdóttir, meðstjórnandi, kosin til eins ár 2022

Þess má geta að þetta er fyrsta stjórnin sem einungis er skipuð konum frá stofnun félagsins árið 1889. Þær voru líklega nokkrar stjórnirnar í upphafi sem einungis voru skipaðar körlum en svona vildi þetta til í þetta sinn. Hins vegar er rétt að halda því til haga að báðir skoðunarmenn reikninga eru karlmenn, þeir Sveinbjörn Egill Björnsson og Steinþór Níelsson, auk þess sem það eru fjórir karlar sem sitja nefnd Flóruvina þó forsvarsmaðurinn sé kona en Gróa Valgerður var endurkjörin í þá stöðu í gær.

Aðalfundur HÍN og fræðsluerindi 28. febrúar

Erindi Sigrúnar Helgadóttur um bók hennar Sigurður Þórarinsson, Mynd af manni I-II, verk Sigurðar og hvað hann gerði fyrir HÍN. Hann var formaður í aðeins 2 ár en hafði mikil áhrif. Erindið byrjar klukkan 19:00. Slóð á Teams streymi má nálgast hér.

Dagskrá aðalfundar byrjar kl. 20:00. Slóð á Teams streymi má nálgast hér.

Erindið og fundurinn fer fram á Náttúrufræðistofnun, Urriðaholtsstræti 6-8 í Garðabæ. Ekið er framhjá Kauptúni og eftir Urriðaholtsstræti, meðfram húsi Náttúrufræðistofnunar. Ekið er upp á efra stæði austan hússins og farið inn um hurð á vestari inngangi. Þar verða blöðrur til að sýna hvar farið er inn á fundinn.

Þeir sem koma gangandi geta farið sömu leið eða upp járnstiga sem er við starfsmannainngang þar sem ekið er inn í bílageymslu vestanmegin.

Ekið er framhjá Kauptúni og eftir Urriðaholtsstræti, meðfram húsi Náttúrufræðistofnunar. Ekið er upp á efra stæði austan hússins og farið inn um hurð á vestari inngangi. Þar verða blöðrur til að sýna hvar farið er inn á fundinn.
hrímþoka

Aðalfundur Hins íslenska náttúrufræðifélags

Boðað er til aðalfundar Hins íslenska náttúrufræðifélags mánudaginn 28. febrúar. Fundurinn verður haldinn í Krummasölum í húsnæði Náttúrufræðistofnunar Íslands í Urriðaholti og á Microsoft Teams (slóð auglýst síðar).

Fyrir dagskrá aðalfundar heldur Sigrún Helgadóttir erindi um bók sína Sigurður Þórarinsson, Mynd af manni I-II. Sigrún hlaut á dögunum íslensku bókmenntaverðlaunin í flokki fræðibóka og rita almenns efnis fyrir bók sína um Sigurð, fyrrum formann félagsins. 

Dagskráin hefst kl. 19:00 með erindi Sigrúnar en aðalfundarstörf hefjast kl. 20:00. Aðgangur er öllum heimill og ókeypis.

Dagskrá aðalfundarins er eins og henni er lýst í lögum félagsins:

  1. Skýrt frá helstu framkvæmdum á liðna árinu.
  2. Lagðir fram endurskoðaðir reikningar félagsins.
  3. Kosin stjórn og formenn faghópa, tveir skoðunarmenn reikninga og einn skoðunarmaður til vara.
  4. Önnur mál.

Á fundinum mun stjórn tilnefna tvo heiðursfélaga

Lagabreytingar

Stjórn leggur til lagabreytingu í tilefni þess að stjórn vill að félagsmenn geti setið í stjórn óháð búsetu en kröfur banka um undirritun eyðublaða getur reynst stjórninni erfið ef stjórnarmaður býr langt frá útibúi og er ekki með rafræn skilríki:

6. grein. Sjö manna stjórn sér um framkvæmdir félagsins og annast öll málefni þess. Hver stjórnarmaður er kosinn til tveggja ára í senn. Formaður er kosinn sérstaklega en stjórnin skiptir með sér verkum að öðru leyti. Annað árið ganga út úr stjórninni formaður og þrír aðrir stjórnarmenn, en hitt árið þrír stjórnarmenn. Við undirritun skjala eða eyðublaða nægir að meirihluti stjórnarmanna skrifi undir eða staðfesti með rafrænum skilríkjum nema landslög kveði á um annað.

Stjórn leggur til lagabreytingu í tilefni þess að útgáfa Náttúrufræðingsins mun verða með breyttu sniði á nýju starfsári.

8. grein. Félagið gefur út tímaritið Náttúrufræðinginn, er félagsmenn fá ókeypis. Í honum skal hvert ár birta skýrslu um starfsemi og hag félagsins. Efni ritsins er öllum aðgengilegt á veraldarvefnum en félagsmenn verði spurðir sérstaklega hvort þeir vilji fá sent prentað eintak, sér að kostnaðarlausu. Við útgáfu ritsins skal leitast við að fara sem umhverfisvænastar leiðir, t.a.m. með umhverfisvottaðari prentun.

Fundargestir eru minntir á einstaklingsbundnar smitvarnir og gildandi sóttvarnarreglur (hverjar sem þær verða í lok febrúar). Slóð á viðburðinn verður send út með auglýsingu á vef félagsins www.hin.is og á samfélagsmiðlum.